2018-19年度「全城撲水計劃」精彩回顧

我地由衷感激鷹君集團同埋慈慧幼苗連續兩年全力支持「撲水」計劃,喺過去一年, 我地已經為超過60間學校或者社福機構安裝新款、能提供冷熱過濾水嘅飲水機,舉辦左超過40場針對即棄膠樽水嘅環保講座。做咁多嘢都只係為左一個目標:希望有更多嘅市民覺醒,認清即棄塑膠產品帶來既禍害,改變自己嘅生活同埋消費習慣,向「膠樽水說不」,自備可重用水樽,用撲水app 搵免費斟水點,撲水,唔係「吹水」,以實際行動做到「源頭減廢」。

改變人心,絕非易事。尤其經過二十多年來嘅廣告洗腦,我去學校講環保,經常遇到校方以膠樽水奉客嘅諷刺場景。但係唔緊要,放眼未來,我地寄望於下一代。試過有幼稚園老師話我知,我去完講撲水之後幾日,有家長向老師訴苦,話佢帶小朋友去買膠樽水時俾小朋友責怪。

小學生呢,好可愛嘅,講座結束撞啱小息或者放學的話,見我喺度視察部飲水機,佢哋就會特登走埋嚟斟水,以行動證明佢哋收到我想宣揚既信息。

中學生則對部飲水機能出冷熱水比較感興趣。血氣方剛既,打完波,有冰水斟,唔駛去㩒機買冰凍膠樽裝飲品;氣虛血弱既,遇上天寒地凍,或者唔方便既日子,有暖水飲真係好緊要架。

大學生呢,真係社會未來既希望。我試過應某大學某書院既邀請,去佢哋個早會對住上千個學生講撲水,之後既發問時間,就有學生站出來質問院長,既然塑膠廢物問題咁嚴峻,點解仲容許校園大賣膠樽水同埋其他膠樽裝飲品?雖然眼見院長面黑兼拒答學生既質問,搞到我要代佢解圍,但係其實我好開心。正如名作家倪匡所言,
「人類之所以有進步,全因為下一代人唔聽上一代話。」

塑膠的原料有99%來自化石燃料,而由於頁岩氣開採技術突破,令生產塑膠既原材料價格大降近三分之二,自2010年起,埃克森美孚化工(ExxonMobil)與蜆殼化工等油企旗下企業紛紛出巨資興建新一代塑膠生產工廠。據估計,美國塑膠工業擴張估計會令未來10年的塑膠產量增加達40%。

睇到呢D 新聞,我不禁自問,當原生塑膠越來越平,越來越多,我地喺度講 reduce, reuse, recycle 真係仲有意義咩?

跟住我又自答:絕對唔可以俾數量越來越多而價錢又越來越平既即棄塑膠蒙蔽,而忘記佢哋帶黎嘅禍害!
唔係因為有希望才堅持,而是因為堅持才有希望。

大家繼續努力!

發佈留言

發佈留言必須填寫的電子郵件地址不會公開。 必填欄位標示為 *

下載 Download